終於到了出殯的日子, 明天大殮之後家裡大概可以開始回復正常吧.
數年前, 爺爺出殯是用佛教加道教的儀式, 兩天要做的儀式極之多, 還要守夜… 外公的喪禮則只是佛教儀式, 簡單得多, 只有尼姑在唸唸唸, 沒有道士出來"表演"破地獄 :XX
- 在美心買了兩打西餅, 原來會買四送一的…共30件
- 在百佳買了兩箱支裝水, 我拿了一箱… 好重
- 做外孫實在比起做孫的舒服
- 又重學了一次如何快速把金銀衣紙摺成元寶(還是蓮花?..)
- 雖然貼了紙表明會把帛金捐去社區中心, 不過不知道有多少人看到呢
- 比想像中多人來啊, 大家都有心
- 比想像中早回家, 真好
- 麻煩客仔沒有煩人, 是外公的保佑嗎?
- 這兩天突然在下雨, 一定是為他而下的!
- 今天的齋午飯非常之不錯啊, 絕對是驚喜!
- 無論如何, 今天應該要笑的啊. :)
從加拿大來的親戚終於有機位走了, 來了足足半個月.. 幸好我剛好不太忙, 所以可以做個無責任導遊帶路四處去…
不過其實比開工更辛苦 XD … 幾乎每天都要出街逛, 就好像自己去了旅行一樣.. 而且還要兼顧工作, 但又要騰些時間出來讓表弟表妹玩電腦.. 結果工作時間大兜亂.. 明天開始應該可以回復正常了…
親戚時 Airline staff, 因為希望早一點走, 所以前天去了 standby 郤完全 no chance.. 親戚那邊三個人, 有兩個 confirm 今天走的, 另一個就順便今天去 standby 了, 幸運地等到第二班機就有位了. 今天等的時候, 聽到有人 standby 了 "Jump seat", 回家一查才知道原來 Jump seat 本來是機司休息用的位置, 是在駕駛倉內的, 好型啊!~~~~ XDD
今日為了影畢業相, 去了中大一趟… 一踏上那架校巴, 又是歡樂滿東華的時候… 十年前表哥影畢業相來過, 又是這樣, 為甚麼十年後又是這樣? ….. HKU 的無乜人搭的 $2 校巴都已經有八達通了, 為甚麼歡樂滿東華的 $5 校巴還沒有? ….. 或者是我心裡不喜歡這地方才會去找碴吧…
我心裡對中大的感覺一直都不太好…大大的校園反而令人有冷冷清清的感覺…當年 JUPAS 去 open day 既時候已經有這種感覺…所以結果就將 HKU 放在首位…
地方大, 可以見到修葺的經費好像都不夠… 四處都會見到多次修補的新舊地面大地圖…給人一種爛容容的感覺… 又因為地方大, 建築物疏疏落落的, 建築物之間沒有連繫, 未能給我一個校園的感覺, 總之有很多很多的東西都令我不太舒服…
最後我得出一個結論: 我同中大, 大概係八字唔夾吧 XD
表哥的兒子係鄉下要點燈, 香港的一班親戚就吃一餐飯, 順便當作團拜. 再順便一點, 當慶祝姑媽生日, 一餐飯三個功能 XD
BB仔好得意, 不過湊佢既阿爸阿媽同賓賓就好似好辛苦咯 XD
算係抱了一下BB仔, 竟然無皺眉無喊無反抗, 真高興 XD
又過年了, 上一年好似過得好快..
上年講過家裡過年通常會有既過程, 今年不如睇下相 XD
大除夕晚上必用碌柚葉沖涼, 食完晚飯就會用個大鑊煲水..
(Um..電話個閃燈好黃… /_\) 其實呢個鑊多數都係用黎蒸糕點, 過年既蘿蔔糕/年糕, 清明重陽的茶果清明仔都係呢度蒸. 底下係燒柴的, 用柴火蒸野o的野都好食o的(感性地覺得 XD)
年初一朝早食完早餐要拜神, 屋企拜神要”擺陣” XD 首先要準備材料..
炸過的粉絲同枝竹, 豆卜(有紅色的), 仲有菠菜蠔豉髮菜金針雲耳冬菇等等, 放入雞公碗度…
菠菜盤係底, 插上枝竹再用其他野圍住佢…就會變成咁樣喇:
拜完神之後就會將佢拆開, 用南乳煮成齋, 成為初一的午飯.
同一餐飯通常都會有(電飯煲)蒸豆豉.. 可能係以前阿爺鍾意食卦..
屋企一向都係清明節重陽節正日去拜山既. 以前去拜山其實係好辛苦既, 因為o的位置實在太偏僻了…
記得以前拜山係要分兩日既. 其中一日早上係祖屋(元朗近屏山)出發, 踩單車向附近既一坐山進發, 去到山腳既一條小路, 半行半爬的上到去一個小空地就有一排金塔要拜. 然後再半爬半行上去半山位置又有另一排金塔, 但只有一條窄窄既小平地, 次次都怕一個唔小心就碌左落山既… 拜完之後就會踩單車返去祖屋, 食個飯之後就向另一個山頭出發. 呢個山頭有好多墳既, 所以已經開晒路, 比較容易.
至於另一日, 就會去到大欖行行山徑, 行到一半位置左右既山邊位置, 一個有好多樹既地方就要係樹林之中爬上去 (好鬼神秘…)
好辛苦咁上到去就係一塊好大塊既空地, 有兩個墳…
其實仲有太公山要拜, 每年重陽之後既星期日都會去拜, 幾乎同一條村入面姓林既男丁都會去. 太公山其實近天水圍既, 我地多數都係踩單車去既, 以前山腳下係空地一塊, 但後來變左個左[車太]車場…除左路程比較辛苦之外, 其實都無乜野, 因為o的長輩會搞掂一切 XD
講番屋企一直拜開果幾個地方..因為實在太難去了, 陸續地所有墳都搬左去比較容易去果個山頭, 每次拜山都只需要去一個山頭就搞掂, 拜山都輕鬆左好多. 以前只有家裡既男丁去拜, 但自從阿爺去左之後, 因為都係葬係同一個山頭, 所以就多左好多親戚去拜.
最辛苦都係除草… 因為係山頭, 野草好多, 多到可以將整個墳遮住晒, 不過比起以前黎講已經好好多架喇. 每次拜山見到草既數量就可以總結果半年多唔多雨水 XD
細個其實覺得好奇怪, 點解有o的墳係一排金塔但有o的只係一個既呢? 原來一排金塔果o的有好多其實係食客. 聽屋企人講, 食客即係你俾飯佢食, 佢就幫你做野既人, 而且通常係來自異鄉既. 佢地死後因為無屋企人, 所以葬埋一齊, 等o的後人會拜下佢地咁.
除草之後就開始拜, 但都有次序既, 輩份較高既人既墳會先拜. 每個塔/墳都放三張錢(溪錢), 放好祭品, 三個大杯三個小杯三碗飯三雙筷放得整整齊齊. 所謂先敬茶後敬酒, 所以先倒茶(大杯)後倒酒(小杯)的. 點蠟燭裝香, 再敬拜一番之後就燒衣紙. 之後敬茶敬酒就移到下一個墳, 重覆所有動作直至最後果個墳. 以前我地會切燒肉黎食既, 食o的生果飲下飲品之後先走既. 但係近幾年都直接返去算數lu….
臨走前仲要派錢, 飯 同灰.. 聽屋企人講派錢/飯係俾附近既遊魂野鬼既, 而灰就係幫個墳劃地盆…
總覺得一系列既程序有佢既意義, 而且(我覺得)都算係一種傳統既藝術.. 所以將佢寫低以作紀錄 :)
